അമ്മയ്ക്ക് പകരമായി അമ്മ മാത്രം. ജ്വലിക്കുന്ന സൂര്യപ്രകാശം പോലെ എന്നും എപ്പോഴും ഒരു വഴികാട്ടിയാണ് അമ്മ. അമ്മയുടെ ഊഷ്മളമായ സ്നേഹം അനുഭവിക്കുന്നതു പോലെ സ്വർഗ്ഗീയമായ മറ്റൊരു കാര്യം ഉണ്ടോ എന്ന് സംശയമാണ്. സ്നേഹത്തിൻറെ നിറകുടമായ അമ്മയെ ഓർക്കുവാൻ ഒരു പ്രത്യേക ദിനം ആവശ്യമില്ല. എങ്കിലും കാലത്തിൻറെ കുതിച്ചുപായലിൽ മാതൃദിനത്തിൻ ചില ചരിത്ര സത്യങ്ങൾ പങ്കു വയ്ക്കുവാൻ ആഗ്രഹിക്കുന്നു.

വ്യത്യസ്തമായ തീയതികളിലായി ലോകത്തിലെ മിക്ക രാജ്യങ്ങളും മാതൃദിനം ആഘോഷിക്കുന്നുണ്ട്. മെയ് മാസത്തിലെ രണ്ടാമത്തെ ഞായറാഴ്ച ആണ് അന്താരാഷ്ട്ര മാതൃദിനമായി ഇന്ത്യയിൽ ആഘോഷിക്കുന്നത്. അമ്മമാരുടെ നിരുപാധിക സ്നേഹത്തിനും ത്യാഗത്തിനും നന്ദി പറയുവാൻ മാറ്റിവെച്ചിരിക്കുന്ന ദിനമാണിത്. കൂടെ അവരുടെ അശ്രാന്തപരിശ്രമങൾക്കും സംഭാവനകൾക്കുമുള്ള കടപ്പാടും.

അമേരിക്കയിൽ നിന്നാണ് മെയ് മാസത്തിലെ രണ്ടാമത്തെ ഞായറാഴ്ച മാതൃദിനമായി ആഘോഷിക്കുവാൻ ആരംഭിച്ചത്. മാതാവിൻറെ വണക്കമാസം ആയ മെയ് മാസത്തിൽ തന്നെ ഈ ദിവസം ആയത് തികച്ചും അനുയോജ്യം.

യുദ്ധത്തിൽ മക്കളെ നഷ്ടപ്പെട്ട അമ്മമാരുടെ പ്രതിഷേധ ദിനമായിട്ടാണ് മാതൃദിനം കൊണ്ടാടാൻ തുടങ്ങിയത്. യുദ്ധം ഇല്ലാതാക്കുക ആയിരുന്നു ലക്ഷ്യം. പിന്നീട് മറ്റ് പല രാജ്യങ്ങളും ഇത് ഏറ്റെടുത്തു.

മുലപ്പാലിലൂടെ പകർന്നുതന്ന സ്നേഹത്തിൻറെ, ശാസനയിലൂടെ പകർന്നു തന്ന തിരുത്തലിൻറെ, ചേർത്തുപിടിക്കലിലൂടെ പകർന്നുതന്ന അതിജീവനത്തിൻറെ, ഓർമ്മപ്പെടുത്തലാണ് ഓരോ മാതൃദിനവും. മാതൃദിനത്തിൽ മാത്രമല്ല ഏതു ദിവസം ആയാലും അമ്മയോടുള്ള സ്നേഹവും കരുണയും അതേനിലയിൽ പങ്കുവയ്ക്കുവാൻ നമുക്ക് സാധിക്കണം. അതിന് ഒരു പ്രത്യേക ദിനത്തിൻറെ ആവശ്യമില്ല.

എല്ലാ ദിവസവും മാതൃദിനം ആയിരിക്കട്ടെ....

എല്ലാ അമ്മമാർക്കും മാതൃദിന ആശംസകൾ...